By Team TJC | 26 July, 2020
সৃষ্টিশীলতাৰ নাথাকে কোনো পৰিসীমা। সেইবাবেই হয়তো বিশ্বজুৰি কৰ’না মহামাৰীৰ প্ৰকোপত হোৱা লকডাউনৰ মাজতো বহু সৃষ্টিশীল কাম আমি দেখিবলৈ পাইছোঁ। অসমতো চলচ্চিত্ৰ জগতখনৰ সৈতে জড়িত বহুকেইগৰাকী শিল্পী, কলা-কুশলীয়ে এই সময়খিনিত স্বকীয় প্ৰতিভাৰে নিৰ্মাণ কৰি উলিয়াইছে কেইবাখনো চুটিছবি। ঘৰতে থাকি হাতৰ মুঠিতে থকা স্মাৰ্টফোনেৰে কৰিছে শ্বুটিং। অভিনেতাসকলৰ কোনোবা যদি গুৱাহাটীত, কোনোবা আকৌ মুম্বাইত। কোনো কোনো ক্ষেত্ৰত অভিনেতাজনেই চিনেমাট’গ্ৰাফাৰ। আৱহ সংগীত, সম্পাদনা, পোষ্টাৰ ডিজাইনিং আদি সকলোখিনি কাম আনকি সম্পন্ন হৈছে কোনেও কাৰো সৈতে সোশৰীৰে দেখা নকৰাকৈ। ছবিবোৰ মুক্তি দিয়া হৈছে ইউটিউবকে ধৰি অন্যান্য অ’নলাইন মাধ্যমত। এনে কেইখনমান চুটিছবি আমি লৈ আহিছোঁ আপোনালোকৰ বাবে।
“আমি ৰ’দ ল’ম (We Will Have Sunshine)” এনে এখন চুটিছবি যাৰ কাহিনীৰ পটভূমিয়ে হ’ল কৰ’না সময়ছোৱাৰ জীৱন। বাহিৰৰপৰা ঘৰলৈ উভতি অহা এজন যুৱকে তেওঁৰ সন্তানসম্ভৱা পত্নী আৰু বৃদ্ধ মাক-দেউতাকৰপৰা নিজকে আঁতৰাই ৰাখি এটা কোঠালিত ছেল্ফ কোৱাৰেণ্টাইন হৈ থাকে। আৱেগক নিয়ন্ত্ৰণ কৰি আপোন মানুহখিনিক সংক্ৰমণৰপৰা ৰক্ষা কৰাৰ বিজ্ঞানসন্মত সজাগতা আৰু শেষত বিৰাট প্ৰাপ্তিৰ হাঁহিয়ে ১ মিনিটৰ এই চুটিছবিখনক অৰ্থবহ কৰি তুলিছে। কাহিনী আৰু পৰিচালনা উপাসনা মহন্তৰ। বিভিন্ন চৰিত্ৰত অভিনয় কৰিছে তেওঁৰ পৰিয়ালৰে সদস্যসকলে ক্ৰমে- ঝুলন কৃষ্ণ মহন্ত (যি নিজেও এগৰাকী ছবি পৰিচালক, সম্পাদক হিচাপে সমাদৃত), বি. কে. মহন্ত, জয়শ্ৰী মহন্ত আৰু গাৰ্গী মহন্তই। সংগীত পৰিচালনা সৌৰভ মহন্তৰ।
কিবা এটা সৰু কথাতে কাজিয়া আৰু পিছত ইজনে আনজনক নমতা। “Conditions Apply”- লকডাউনৰ মাজত চহৰৰ ফ্লেটত আৱদ্ধ হৈ পৰা এহাল স্বামী-স্ত্ৰীৰ এটি মিঠা প্ৰেমৰ কাহিনী। অসম সন্তান বলোৰাম দাসৰ পৰিচালনা আৰু তেওঁৰ সৈতে পত্নী টিনা ভাটিয়াৰ অভিনয় আকৰ্ষণীয় হৈছে। চুটিছবিখনত অভিনয় কৰাৰ লগতে দুয়োগৰাকীয়ে একেলগে চিনেমাট’গ্ৰাফাৰৰ কামখিনিও কৰিছে। কাহিনী ৰাহুল প্ৰতাপৰ, সম্পাদনা কৰিছে ৰূপাংকৰ দাসে।
“নিচুকনি”- চুটিছবিখনৰ নির্মাতাগৰাকীয়েই হ’ল ইয়াৰ এটি বিশেষত্ব। ছবিখনৰ পৰিচালনা, চিত্ৰনাট্য আৰু সংগীত পৰিচালনা ৰাষ্ট্ৰীয় চলচ্চিত্ৰ বঁটাপ্ৰাপ্ত যশস্বী কণ্ঠশিল্পী তৰালি শৰ্মাৰ। অভিনয় কৰিছে বলোৰাম দাস, ৰেণু শৰ্মা আৰু শিশুশিল্পী তনিষ শৰ্মা বৰদলৈয়ে। লকডাউনৰ ফলত পৃথিৱীৰ বিভিন্ন লোকৰ জীৱনত পৰা নানানটা প্ৰভাৱৰ মাজৰে এটা পৰিয়ালৰ অৱস্থা আৰু অনুভূতিক চুটিছবিখনৰ জৰিয়তে সুন্দৰকৈ তুলি ধৰা হৈছে।
“এটা কথা সোধো (Can I Ask Something ?)”- নামটোতেই আছে এক কৌতুহলী ভাব। গাৰ্গী মহন্তৰ পৰিচালনাৰে চুটিছবিখনে এটি শিশুৰ মনস্তাত্ত্বিক দিশটোক উপস্থাপন কৰিছে। লকডাউনৰ বাবে নিজৰ সমনীয়াবোৰৰপৰা আঁতৰি থকা ধুনে নিজৰ কৌতুহল নাইকিয়া কৰিবলৈ পৰিয়ালৰ সকলোকে নানা প্ৰশ্ন কৰে। এই সময়ছোৱাত শিশুটিয়ে কিদৰে নিজেই কিছুমান সমনীয়া বিচাৰি উলিয়াই লয়, তাৰ নিষ্পাপ কাহিনীটো আপুনিও চাব পাৰে।
“Time Loop (সময়ৰ বৰ্তনী)”- কিছুমান গভীৰ ভাবক সৰু সৰু প্ৰতীক আৰু বস্তুৰ মাজেৰে অৰ্থবহভাৱে প্ৰতিফলিত কৰা এখন সুন্দৰ চুটিছবি। কৰ’না মহামাৰীৰ সময়ত ঘৰতে আবদ্ধ এগৰাকী বৃদ্ধা, তেওঁৰ জীয়ৰী আৰু এটি কণমানিৰ মনৰ অৱস্থাক তুলি ধৰিছে কাহিনীকাৰ তথা পৰিচালক সৌৰভ মহন্তই। অভিনয় কৰিছে দুলৰী মহন্ত, সন্ধ্যা কাকলি আৰু কণমানি ৰিহাই। ৰণ্টু মহন্তৰ কবিতাৰ মাজেৰে আগুৱাই যোৱা চুটিছবিখনে কৈ গৈছে এগৰাকী বয়সস্থ মহিলাৰ মনৰ বহু কথা।